رواية جديدة أسود الداخلية لأسماء عبد الهادي - الفصل 2
قراءة رواية أسود الداخلية كاملة
تنشر حصريًا على مدونة رواية وحكاية قبل أي منصة أخرى
قراءة رواية أسود الداخلية
من روايات وقصص
الكاتبة أسماء عبد الهادي
الفصل الثاني
البنات أول ما شافوا لينا داخله عليهم منه قالت
_ صباح الخير يا لينا أخبارك ايه ياحبيبتي
لينا
_ صباح النور يا بنات عاملين إيه
سمر رفعت حاجبها وقالت
_ أدهم اللي نزلك أكيد صاحبه معاه أنا متأكدة
لينا
_أيوه فعلاً
سمر بضيق
_يا باي إنسان رخم وإيه المشكله يعني لما صاحبه يكون موجود وإنتي قاعده في أوضتك ولا هو كل أما صاحبه يجي هتنطردي إنتي من البيت
لينا بإنزعاج
_أنا كمان متضايقه من الموضوع ده ومش بعرف أقعد مع أخواتي من سي عدي ده
منة
_ااه بس سيبك من كل دا .. إنتي منورانا طبعاً وفي وسط إخواتك
إبتسمت لينا
_اه يا قلبي ربنا يخليكم ليا
منة
_إلا قوليلي يا لينا مازن كويس.. راجع من المهمة المرة دي كويس!! بالله عليكي طمنيني عليه
لكزتها أختها في كتفها
_ما تتلمي يا بت بدل ما أروح أقول لقصي
منة
_إيه مش بطمن عليه
سمر
_على أساس ياختي إنك متخبتيش ورا الستارة وشوفتيه فاتكتمي بقا ها اتكتمي
منة
_يا باي عليكي هادمة الملذات
ضحكت لينا
تعرفي يا منة إنتم فعلاً لايقين على بعض أوي
منة
بجد يا لينا تسلميلي يا روحي
سمر
_ياربي على المحن أنا رايحة لماما بدل ما أنفجر من أختي الممحونة على الصبح دي
لينا
أنا جاية معاكي
منة
خدوني معاكم أعمل لمزوني الأكل
سمر
صبرني يارب
كل دا ولينا بتضحك عليهم
❈-❈-❈
على السلم
حط مازن إيده على دماغه
_ اه ياني ياما يا حظك المنيل يامازن ياني وربنا ما لحقت حتى أدخل البيت ولا حتى أقعد ولا أحط لقمه في بوقي عايزنا في إيه دلوقتي ده كمان هو مافيش وراه إلا إحنا ولا إيه... وربنا لو قطع الأجازة لعمل لكم..
أدهم بص له بتحذير
هتعمل إيه يعني
مازن
هعمل مناحه يابني هو أنا أقدر أعمل حاجة منه له
❈-❈-❈
تحت في المطبخ نادية مامة أدهم كانت بتحضر الأكل مع حنان مامة قصي
_تعرفي يا حنان أنا بفضل أعد الدقايق والثواني علشان ولادي يرجعوا من مهماتهم وفي نفس الوقت بكون مش عايزاهم يرجعوا
حنان
ليه كفى الله الشر
_ بيصعب عليا قصي.. دا حبيبي دا أنا اللي مربياه وصعبان عليا رقدته دي كانت روحه في المهمات الصعبه اللي بيطلعها وأكيد لما بيشوف أصحابه راجعين من المهمات دي بيتأثر
_ لا ما تقلقيش من ناحيه قصي الحمد لله هو صابر لأقصى حد وكمان الحمد لله قدر إن هو يشغل وقته بحاجه ثانيه ويروح شركته ويعوض حياة الداخليه بحياة رجال الأعمال ربنا يصلح حاله ويعوضه خير يارب يا حبيبتي يارب
البنات وصلوا للمطبخ
سمر
_ماما محتاجة مساعدة يا حبيبتي
حنان
_هنا في المطبخ لا إنما قصي طلب تطلعوا فوق في الشقة اللي في الدور الثالث تنظفوها وتنزلوا على طول
سمر بإستغراب
_ننظفها!! ليه مين هيسكن فيها وبعدين دي كانت فاضية إمتا اتحط فيها عفش وأثاث
حنان
_يلا يا سمر بلاش غلبة اطلعي.. يلا يا بنات
لينا
_عمتو أنا واقعة من الجوع نفطر الأول من فضلك ونبقى نطلع علشان خاطري
_ماشي افطروا يلا على السريع لو قصي سأل ولقى إنكم لسه مطلعتوش متلوموش إلا نفسكم
منة
لا هنفطر بسرعة أهو
❈-❈-❈
وصل الشباب لشقة قصي اللي قدام شقة أهله واللي بيستخدمها زي مكتب ليه بيخلص فيها شغله
ولسه هيخبطوا قال
_ادخلوا
مازن مال على عدي
_ عرف إزاي دا إحنا لسه مخبطناش
عدي
_دا بيسمع دبة النملة .. أدخل أدخل
أدهم دخل أول واحد وسلم على قصي
_قصي إبن عمي عامل إيه ياباشا
إبتسمله قصي
_إزيكم يا رجالة حمدالله على السلامه
وسلم عليه كل من مازن
_منور ياباشا مصر
و عدي
_قصي مدرب الأسود عامل إيه ياباشا
شاورلهم قصي يعقدوا
قصي
_اقعدوا عايزكم يارجالة
مازن
أوعى تقول إن الأجازة بح دا أنا أروح فيها
قصي بصله بحدة
اتنيل يا زفت واقعد
_خلاص قعدت متبقاش حمقي كدا
عدي
_خير يا قصي في حاجة مهمة!!
قصي بغموض
_إيه بلاش أسلم على رجالتي ونفطر سوا ولا إيه
الشباب اتنهدت براحة
مازن
_يا شيخ وقفت قلبي
قصي
_ اه صح عدي شقتك اللي فوق بتتنضف خلاص
عدي بإستغراب
_شقتي؟؟
_اه مالك مستغرب ليه من هنا ورايح هتقعد فيها بدل ما أدهم كل شوية يخلي لينا تسيب أوضتها وتنزل
عدي بص لأدهم بعتاب
_ليه كدا يابني زمانها متضايقة من وجودي دلوقتي
أدهم
_عادي يابني هي بتحب تقعد مع بنات عمها وطول الوقت تحت معاهم أصلاً
قصي
دا صحيح بس أنا بردو عايزها تاخذ راحتها في بيتها وإنت كمان متحسش إنك متقل على حد فشقتك اللي فوق تعمل فيها اللي إنت عايزه والشباب يطلعولك فيها تقضوا وقتكم سوا
عدي
_بس يا قصي الشقة دي مش من حقي
_بس مش عايز أسمع حاجه واللي أقوله يتنفذ يا زفت
مازن
_عدي إسمع الكلام وإلا هتتكدر يابني
إبتسم عدى
_ربنا يخليكم ليا
في الوقت دا دخلت نادية وحنان ومعاهم الفطار اللي فيه كل ما لذ وطاب
مازن
الله الله على الأكل والروايح اللي ترد الروح
عدي
تعبتوا نفسكم ليه بس .
حنان
ولا تعب ولا حاجة يا حبيبي كلوا بالهنا والعافية
أدهم
_تسلم إيديك يا خالتي
_الله يسلمك يا حبيبي
قصي لنادية
_ منتحرمش منكم أبداً ياخالتي
_ولا منك يا حبيبي ربنا يبارك فيك ويردلك صحتك يارب قادر يا كريم
الشباب أكلوا مع بعض
وبعد الأكل
عدي قال
_قصي أنا كنت عايز أقولك اقتراح كدا ويارب توافق
_خير
_بفكر نطلع رحلة يومين للمكان اللي تحدده إنت طبعاً أهو نغير جو
قصي سكت
فعدي قال
_طب يوم واحد يا قصي نفك عن نفسنا
اتنهد قصي
_طيب بكرة أرد عليكم وأقولكم رأيي.. إطلعوا إنتم بس ارتاحوا دلوقتي
❈-❈-❈
الشباب طلعوا لفوق فقابلوا البنات على السلم نازلين
أدهم بحدة
_كنتوا فين و بتعملوا إيه فوق
سمر بضيق لأنها مبتحبش حد يزعقلها قدام حد غريب
_كنا بنظف الأوضة اللي فوق زي ما قصي طلب
عدي بأسف
_معلش يا بنات تعبتكم معايا
لينا
_هي الشقة دي إنت اللي هتقعد فيها
عدي
_اه قصي قرر إني أقعد فيها علشان مش كل شوية تسيبي أوضتك بسببي
_لا على فكرة عادي مفيش مشكلة
❈-❈-❈
منة ومازن نزلوا كم سلمة بعيد عنهم
مازن قال بهيام وهو غاضض بصره
_يااه أخيراً القمر طل على شرفات قلبي
لينا نزلت راسها بكسوف
حمدالله على سلامتك يابن عمي
ياااه قد إيه أنا في قمة سعادتي لما شوفتك وسمعت صوتك
اتحرجت منة ونزلت بسرعة وهي بتقول
_اا.. عن إذنك يابن عمي
_يا سلام إمتا بس أنول المراد بقا
❈-❈-❈
أما أدهم فقال لسمر
_مالك يا بت إنتي بتردي عليا بحدة كدا ليه هو دا ترحيبك بابن عمك؟؟
_والله إنت اللي بدأت وبتزعقلنا أوي قدام صاحبك
_أنا زعقت
_اه زعقت
_طب وإيه المشكلة
بصتله بضيق
_ أنا مابحبش حد يزعقلي قدام حد غريب
إبتسم أدهم
_يعني لو زعقتلك وعدي مش موجود مش هتزعلي وتلوي بوزك شبرين كدا؟
لوت بزوها أكتر
_لا طبعاً أنا محدش يزعلقي..
سكتت شوية وقالت
_ إلا قصي طبعاً
ضحك أدهم وقال
_طب يلا انزلوا قال محدش يزعقلي قال
_إنت بتضحك ليه دلوقتي
_إيه هتمنعيني من الضحك؟؟ أما عجيبة صحيح
سمر بصتله بضيق ونزلت
❈-❈-❈
عدي
_لا مش عادي على فكرة أنا مكنتش أعرف إنك بتسيبي أوضتك وتنزلي إلا النهاردة ولو كنت عرفت دا قبل كدا مكنتش جيت ابداً أنا مابحبش أكون مصدر إزعاج لحد فما بالك إنتي
ارتبكت لينا
_حصل خير مفيش مشكلة خلاص .. إتفضل شقتك جهزت خلاص تتهنى بيها
_تسلموا بجد
أدهم بص لأخته بحدة فنزلت على طول بخوف
عدي
_إيه يابني فزعت البنت
_كنت بتقولها إيه يازفت وقعتك سودا النهاردة
_ولا حاجة كنت بعتذر لها
_لا يا شيخ طب أطلع على شقتك ومشوفش لسانك يخاطب لسانها تاني إنت فاهم
_إيه يا عم أنا عملت إيه بس... ماإنت كنت بتكلم سمر أخت قصي حد كلمك
_بكلمها إيه يا متخلف دي بنت عمي وأخت صاحبي يعني زي أختي
_زي أختك عليا بردو
_عدي إتلم بدل ما ألمك
_خلاص خلاص أنا طالع أنام
_يكون أحسن غور يالا
أدهم بص على اخوه لقاه واقف وسهتان
_ماله الزفت دا راخر
عدي بسخرية
_تلاقيه كان بيكلم بنت عمه يعني أخته بردو واخد بالك إنت
أدهم بص لعدي واتخذ وضع الهجوم
_لا إنت عايز تتظبط النهاردة
عدي هرب على شقته
أدهم
_يا جبان بتجري
_الجري نص الجدعنة.. وإنت لما بتتحول بتقلب زي صاحبك سلام
قالها ودخل وقفل الباب
أما أدهم فشد أخوه من هدومه ونزلوا على شقتهم يرتاحوا
❈-❈-❈
تاني يوم قصي ركب عربيته وراح على شركته اللي بدأ يشتغل فيها بعد الحادثة اللي اتعرض لها في مهمة من المهمات وفي الطريق عربيته خبطت في عربية تانية
خرجت منها بنوتة جميلة بس لسانها سليط شوية خبطت على إزاز العربية بحدة
_ إنت يا حيوان مش تفتح إنت أعمى ولا إيه
إتكلم قصي بهدوء مميت
_ إسحبي كلمتك اللي قولتيها دي حالاً
_لا مش هسحبها وأعلى ما في خيلك اركبه ولو كنت أعمى ليه بتسوق عربيات ها ليه ولا هو بهايم وبس بتسوق
بلع قصي عصبيته بصعوبة وضغط على سنانه
وبعدها تجاهل كلامها ونادى على السكيورتي
_أمين أمين
جه السكيورتي بسرعة
_تحت أمرك ياقصي بيه
شاورله على شنطة العربية
_نزلي الكرسي من فضلك
_حاضر تحت أمرك يا قصي بيه
مرام اتنزفت أكتر وقالت
_إنت بصلي هنا مش أنا بكلمك ولا هو أعمى ومتغطرس كمان
_إنتي عايزة إيه.. خبطت في عربيتك غصب عني ولسه يادوب وهعتذر عن الغلط الغير متعمد لقيتك فتحتي زي التور الهايج واخدتي حقك وزيادة كمان بلسانك اللي عايز قطعه دا .. عايزة إيه تاني .. لسه عايزة تغلطي أكتر من كدا!!
اتغاظت من كلامه رغم إنه مغلطش فيها لكنها زعقت
_ لا إنت بتقل أدبك عليا والله عال هو دا اللي ناقص لا أنا هعمل فيك محضر وهوديك في ستين داهية
قصي وهو بيفتح باب العربية
_ تمام نمر العربية عندك أهي واسمي بالكامل خديه من السكيورتي واعملي اللي إنتي عايزاه بس عدي من قدام العربية علشان أنزل
_ لا إنت إنسان وقح وقليل الزوق كمان
في الوقت ده جاب أمين الكرسي المتحرك وحطه عند الباب
_ اتفضل يا قصي بيه .. هات إيدك أساعدك
شاورله قصي
_ لا لا أنا هعرف أنزل شكراً يا أمين ربنا يكرمك
_ أي خدمة يا بيه
مرام بلعت ريقها بتوتر وخزي من نفسها وقالت في نفسها
_ يا نهار أبيض أنا إيه اللي عملته دا .. دا طلع عاجز وأنا اللي فكرته خبطني بقصده وبيستظرف علشان يلفت انتباهي زي غيره .. قد إيه أنا كنت سخيفة أوي
قعد قصي على الكرسي بتاعه وهي وسعتله الطريق
وجت تعتذر فكانت مكسوفة من نفسها فمقدرتش تنطق بحرف
أما قصي مشي بالكرسي لحد مادخل جوا الشركة بهدوء تام
أما هي فراحت سألت أمين
_ من فضلك مين دا
_ دا قصي بيه الصياد صاحب الشركة
بلعت ريقها أكتر
_ يخص عليا قد إيه كنت قليلة الذوق وهو كان صبور أوي أكيد اذيته ووجعته أوي
في الوقت دا جالها إتصال فردت بضيق
_ حاضر جاية يووه بقا
يا ترى مين مرام دي وهل دورها انتهى لحد هنا ولا لسه هيبتدي؟؟
❈-❈-❈
الباب خبط ففتحت سمر
أدهم
_صباح الخير يا سمر قصي صحي؟
_صباح النور .. أبيه قصي صحي من بدري ونزل الشركة
_معقول بدري كدا
_ اه هو إنت يعني تايه عنه.. أبيه قصي بيحب الانضباط في المواعيد جداً
_ معاكي حق.. وإنتي بقا لابسة ورايحة فين كدا
_ إيه السؤال العجيب دا اللي مش في محله إنت متأكد إنك ظابط في الداخلية ؟؟
_ في إيه يابنتي ما تتكلمي عدل
_ إيه اللي في إيه هكون رايحة فين يعني على الصبح أكيد الجامعة دي محتاجة كلام
_ طب ياختي ما تردي وتقولي الجامعة بدل اللفة الطويلة العريضة دي
_ اصلي بصراحة استغبيت السؤال
_طب لمي لسانك بدل ما ازعلك
_ هو أنا قلت إيه إنت اللي سؤالك مستفز
_ اللهم طولك ياروح.. طب اتنيلي تعالي هوصلك في طريقي وأنا رايح الشركة لقصي.. طالما إنتي كدا فاشلة وكسولة ورايحة متأخر دي منة ولينا نزلوا من بدري علشان كدا بسألك رايحة فين يا اغبى أخواتك
_ الله شوف إنت اللي بتطول لسانك أهو
_ بنت إنتي أنا أقول براحتي مترديش عليا
_ ليه بقا إن شاء الله
_ سمر هزعلك
_ وأنا مش بخاف يا أدهم
_ إسمي المقدم أدهم ها متنسيش تاني
_ ياباي إنت عايز إيه دلوقتي مش رايح لصاحبك إتفضل روح
_ اتنيلي أمشي قدامي علشان أوصلك
_ لا شكراً هروح لوحدي
_ على فكرة دا أمر أنا مش بطلب منك
بصتله بعند
_ وأنا مش بركب مع شباب لوحدي حتى لو كان إبن عمي
نفخ أدهم بضيق وطلع موبايله واتصل بقصي
_ أيوة يا قصي أنا هوصل سمر للجامعة في طريقي تمام !
_ ماشي يا أدهم وتعلالي عايزك
_ حاضر يا باشا جاي
_ العيال فين
_ عيال مين .. ااه عدي ومازن لسه في سابع نومة ولا هيقوموا النهاردة ولا بالطبل البلدي
هز قصي دماغه بضجر منهم
_ طب تعالى إنت حالاً وحسابي معاهم عسير
أدهم بتسلية
_ يستاهلوا .. تمام جايلك مسافة السكة
قفل مع قصي وبص لسمر بحدة
_ قدامي اخلصي أخذت الإذن من أخوكي كدا ارتاحتي
_ لا طبعاً .. أنا مش عايزة أركب معاك إيه اللي يجبرني لدا
أدهم تنح شوية واتضايق منها وبعدين مشي وسابها وراح عند عربيته وهو بيكلم نفسه
_ غبية هي فاكرة نفسها إيه.. بس طالعة دماغها ناشفة لأخوها .. اه لو أقدر أكسر دماغها دي مكنتش هتأخر
خرجت سمر ونادت عليه
_ ااا أدهم
_ عايزة إيه
_ ممكن من فضلك توصلني للحامعة
_ نعم ياختي أومال أنا كنت بقول إيه دلوقتي واخذت إذن مين
_ ماهو أصل يعني أنا إتاخرت ولازم أوصل بسرعة علشان المحاضرة متفوتنيش
_ طب ما تفوتك وأنا مالي
_ إيه دا يعني مش هتوصلني
_ لا شطبنا خلاص
_ هو إيه دا
_ إنتي يا متخلفة إنتي مش لسه قايلة مش عايزة تركبي معايا
_اا أيوة ودا لأنك عايز تجبرني على دا وأنا محدش يجبرني أنا أعمل اللي على مزاجي
أدهم بغيظ
_بقا كدا .. طب روحي جامعتك لوحدك وركب العربية وسابها ومشي
_إيه دا .. دا مشي وسابني بجد ..عااا .. يا مغرور... يا غبي.. يا...
وفجأة لقت حد وراها بيقول بصوت مخيف
_ سمعيني تاني كدا قولتي إيه
اترعبت واتخضت وبصت وراها
_ هييء إنت سمعتني إزاي وجيت ورايا إمتا وأنا شايفاك سايق العربية قدامي
_ لبست طاقية الاخفا ياختي.. المهم كنتي بتقولي إيه؟
ضحكت بسخافة
_ هيه لا دا أنا كنت بتخانق مع دبان وشي معلش مجنونة بقا متاخدش عل كلامها .. دادا .. تقريباً ماما بتنادي عليا.. أنا هطلع أشوفها عايزة إيه وبلاها جامعة النهاردة .. حاضر يا ماما جاية أهو
اعترض طريقها
_ وقفي يازفتة إنتي هنا
بلعت ريقها
_ استر يارب وعديها على خير دا هيتحول لأسد من أسود الداخلية إنتي اللي جبتيه لنفسك يا سمر
فقالت
_ أدهم قصدي حضرة المقدم أدهم أنا آسفة أوي أرجوك عديها وربنا ورايا محاضرة مهمة
شاورلها على العربية
_اركبي ومسمعش صوتك طول الطريق اخلصي
ركبت وهي بتبرطم
_قال يعني أنا اللي عايزة أركب معاك هو إيه الهم دا
_بتقولي حاجة يا بنت عمي
_ها لا أنا بقول دعاء الركوب سبحان الذي سخر لنا هذا وما كنا له مقرنين
_طيب كويس
سمر فضلت طول الطريق مكتومة خالص
و أدهم ضحك بتسلية
ووصلها لحد الجامعة فنزلت بسرعة
_شكراً يا أدهم سلام
_استنى يازفتة متجريش كدا
_إيه إتاخرت وربنا المحاضرة خلاص بدأت من خمس دقايق
بصلها بحدة
_قلت متجريش سمعتي أنا قلت إيه
زفرت بضيق
_طايب حاضر
_إياني أشوفك بتجري في الجامعة لأي سبب
مردتش فزعق
_فاهمة!!
_ما قلت طيب يا أدهم الله
قالتها ولفت ومشيت وهو إبتسم تاني بتسلية وركب عربيته وراح على الشركة
❈-❈-❈
وفي مكتب قصي
_خير يا قصي
_خير أقعد .. عدي كان طالب يطلع رحلة مش كدا
_هيزعلوا لو رفضت بصراحة آخر مهمة ادوها بنجاح فسيبهم يفرحوا
قصي بغموض
_وماله الرحلة هتكون لحلايب وشلاتين
_ هار إسوح إنت كدا بتسوحنا ياقصي
_ مش عايزين رحلة.. أدي رحلة في وسط الطبيعة الساحرة
_ قصدك في الهِو ياقصي حرام عليك دول مش بعيد يطبوا ساكتين كدا .. دا إنت ناقص كمان تقول إنها مهمة مش رحلة
_ بالظبط كدا
_ حلو تبقى كملت.. دول هيتصدموا صدمة عمرهمم
_ أنا مش عايزك تقولهم حاجة غير إنها رحلة وهناك هتتلقوا التعليمات المطلوبة منكم بالظبط
أدهم أدى انتباه
_ تمام يا فندم
في الوقت دا الموظف خبط
فقعد أدهم بسرعة وقال
_ طب هات أي ملف كدا أساعدك وأهو أجرب نفسي
_يا بني مش هتفهم حاجة ادي العيش لخبازه
وبعدها بص للموظف
_تعالي يا اكرامي جبت الملف اللي طلبته منك
_اه يا فندم اتفضل
_تمام سيبه هنا وروح إنت
_حاضر يا فندم
حطه اكرامي ومشي
أدهم بضيق
_المسرحية السخيفة دي هتستمر لحد إمتا
قصي بحدة
_شش أدهم اكتم إنت الوحيد اللي تعرف بدا حتى مازن وعدى ميعرفوش ودا لأني بعتبرك نصي التاني وكاتم أسراري فمش عايز أي غلطة أو لخبطة منك فاهم
بلع أدهم ريقه بخوف
_فاهم يا باشا قلبت ليه
اتنهد قصي وقال
_لسه مآنش الأوان إنت عارف إني مستهدف من قبل عصابات كتير فدا الحل الأنسب خليهم مفكرين إنهم اتغلبوا عليا وارتاحوا مني
❈-❈-❈
وصلت لمكتبه كان لافف وشه للحيط وعاطيها ضهره
_أنا جيت أهو يا أيهم زي ما طلبت
_ إتأخرتي ليه
_ متأخرتش مسافة السكة على فكرة
زعق مرام إنتي هتجادليني أنا قلت إتأخرتي
أنا آسفه يا أيهم مش هتأخر تاني
اقعدي استغربت ازاي عارف إن هي واقفه وهو مش باصص ليها أصلاً
قعدت بهدوء وقالت أنا جيت أهو شكلها مهمه جديده ولا إيه
بالظبط كده مستعده!
اتنهدت بأسى لأنها معندهاش حل تاني
مستعدة يا أيهم
لفلها .. كان شعره طويل وملامحه قاسية رغم إنه وسيم
وناولها ملف
_ دا الملف فيه كل اللي هتحتاجيه عن المهمة الجاية وعايز تنفيذ دقيق إنتي فاهمة يا مرام وإلا فيها روحك أو الداخلية تقبض عليكي ونخلص
اتضايقت مرام
_ أيهم انت بتكلمني ليه كدا .. أنا على طول بنفذ مهامي بدقة متناهية
_ عارف ومتأكد من دا علشان كدا مسكتك المهمة الدقيقة دي
بصلها لقاها متضايقة فحب يصالحها
_ إنتي عارفة إننا منقدرش نستغنى عنك يا مرام
_ ماهو باين من أسلوب التهديد اللي بتكلمني بيه يا أيهم
_ مرام متنسيش نفسك ولازم تكوني عارفة إن دا أسلوبي
- مع أي حد إلا أنا .. أنا اختك ياأيهم
_ معاكي حق لازم أفرق فعلاً.. يلا ادرسي الملف وهقابلك بكره أشوف خططتك و هتعملي إيه
_ ماشي .. سلام
جت تمشي فقال
_ إستني خذي الفيزا كارد دي هتحتاجيها في المهمة الجاية
_ تمام
خرجت من مكتب أخوها وركبت عربيتها تاني وروحت على البيت.
❈-❈-❈
مازن كان قاعد مع أدهم و عدي في شقه عدي وأول ما سمع بخبر المهمه فضل يندب حظه
قلبي عندكم يا فرقة الأسود مش مكتوبلكم الفرح ابداا لا وأنا اللي كنت نازل علشان أخطب يا فرحه ما تمت عيني عليك باردة ياخويا
عدي ما قدرش يمسك نفسه من الضحك
أما أدهم فزعق وقال إنت يازفت إنت هتفضل تندب كده زي الستات ما تنشف شويه انشف إيه
هو أنا قاعد فيا حيل ده بيقول لك حلايب وشلاتين يخربيت كدا
ده لو قاصد مين فينا مكانش هيبعتنا هناك ده إيه الغلب ده ياناس
عدي
لا وكل ده وهو مش شغال معانا أومال لو رجع تاني يشتغل في الداخليه هيعمل فينا إيه
أدهم
خلاص بقى ياشباب هونوا عليكم مهمه وهتعدي وعلى فكره وقال إحنا طالعينها في الأساس رحله
مازن
ده ظاهرياً بس يعني مش عارف صاحبك حسرة عليها وحسره عليها
قول لسه هيكمل كلامه لاقى قصي في وشه وبيبص له بحده
كمل كمل.. كمل نواح يا مازن
قالها قصي واداله بالبونيه في وشه
مازن
صرخ وقال خلاص وربنا تبت مش هتتكرر إيدك تقيلة يا أخي
قصي بجدية
انتباه يا زفت منك ليه
الكل قدم التحية العسكرية ووقفوا انتباه
قصي لف قدامهم بالكرسي المتحرك
_انتوا طالعين الرحلة وهتاخدوا راحتكم فيها على الآخر وفي اللحظة المناسبة هتتلقوا التعليمات بالمهمة الجديدة
عدي
معلش بس يا وحش عندي استفسار
إتفضل
يعني مش مفقوسة أوي المهمة دي .. يعني إيه اللي يخلينا نسيب شرم والغردقة أو مطروح ونطلع حلايب مش مفقوسة أوي دي
_ ما هو إنت يا فاشل جغرافيا منك ليه ...متعرفوش إن حلايب فيها أماكن سياحيه وطبيعية خلابة جداً ودي مناسبة جداً للي بيحب الكامبنج والتخييم مكان ساحر وهادي وللسفاري والسابقات وكمان بعيد للمهربين يتصرفوا براحتهم فهمت قصدي
عدي
فهمت يا باشا تمام حلايب حلايب
أدهم
واثقين في اختياراتك يا وحش
مازن
يا مدلعنا ومسوحنا ياوحش
المفآجئة إني جاي معاكم
مازن فتح بوءه
أوبا الوحش بنفسه هيحضر المهمة دي شكلها مهمة خطيرة بقا
_ إنت يا غبي هحضر مهمة إيه بهيئتي دي... إنتوا طالعين رحلة عائلية فازاي يعني هتطلعوا من غير إبن عمكم لو طلعتوا لوحدكم زي أي مهمة بقيتوا تطلعوها من غيري هتكون مكشوفة أوي
_ اه صح معاك حق.. دي شكلها هتكون رحلة ما يعلم بيها إلا ربنا
_ بتقول حاجة يا مازن
_ لا أبدأ دا أنا بقول سنتنا فل
_اه طب حيث كدا بقا نحاسب على اللي عملتوه النهاردة
مازن قام يجري
_استنى وربنا ما عملت حاجة دا أنا قمت من النوم على عندك على طول وربنا حتى ما بليت ريقي بماية حتى يامفتري
قصي
_ايوة ما هو دا اللي هحاسبكم عليه ... إنتوا هتقضوا اجازتكم في النوم ولا إيه
عدي قام وقف
_لا قصي متهزرش أومال نقضي الأجازة في إيه مثلاً في الشغل
_طبعا يا كسول منك ليه
عدي بضيق
_لا متقولش.. إنت بتهرج معانا مش كدا هي دي الكاميرا الخفية هي أنا عارف الكاميرا هناك أهي
قصي زعق
ولا إنت وهو نتعدل ها
مازن كان هيعيط
_لا وربنا اللي بيحصلنا كتير .. بص أنا هقولك أنا ياريتني ما دخلت شرطة ولا بقيت ظابط أنا. اانا هتجوز واقعد في البيت أرحم
أدهم مقدرش يمسك نفسه من الضحك
عدي بانزعاج
إنت بتضحك يا زفت .. إبن عمك هيخلينا نمشي نكلم نفسنا حرام عليك يا شيخ حرام عليك إنت حد مسلطك علينا
أدهم وهو لسه بيضحك
قصي خف عليهم هيفطسوا منك كدا
_يا بني أعملهم إيه أكتر من كدا دا أنا مدعلهم على الآخر وهطلعهم رحلة
عدي
_اه رحلة اه
مازن
_رحلة بردو متشكرين يا زوق أنا ماشي ومش عايز أعرفكم من هنا لحد معاد السفر
أدهم
_خد يالا هنا يابني
_وربنا ما قاعدلكم فيها
قصي
_الواد دا مش هيكبر ابداً
مازن كان ماشي فكان هيخبط في الصينية اللي منة شايلاها
منة
عااا الأكل كان هيقع
مازن بهيام
أنا آسف أوي مأخدش بالي إنك في طريقي
مش تاخد بالك يا مازن
أعمل إيه لأخوكي اللي هيموتني ناقص عمر بسبب عمايله
لا بعيد الشر عنك يا مازن متقولش كدا بالله عليك
خايفة عليا
اتحرجت ونزلت راسها وقالت بخفوت
_الأكل ماما طلبت مني أطلعه
_يا خبر وطالعة الثالث لوحدك طب كنتي نادي عليا وأنا اشيله عنك
_لا من التاني بس.. الأكل عملناه عندكم في الشقة
_بجد يعني إنتي كنتي عندنا في الشقة طول الوقت وأنا معرفش
_يعني كنت هتعمل إيه
كنت هزوغ من اخوكي طبعاً وافضل في الشقة
_احم أنا هنزل بقا
_مع السلامة يا بنت عمي ..يارب قرب البعيد يارب
رجع مازن بالأكل
أول ما شافه قصي
إيه اللي رجعك
الحق عليا قلت اجيبلكم تطفحوا وتتقوتوا
قصي لا فيك الخير ياخويا
قصي بقولك إيه بعد الغدا أنا عايز افاتحك في موضوع مهم
عدي
أيوة بقا يا عمهم
مازن اسكت إنت
قصي بهدوء
ماشي يا مازن بعد الأكل نتكلم
وبعد الأكل ولسه مازن هيتكلم
_قصي أنا.. أنا
_انجز يالا أنا مش فاضيلك
_أنا كنت عايز.. اخ..
ولسه هيكمل جه تلفون لقصي
_تمام يا فندم هبلغهم حاضر في أمان الله
الثلاثة بصوا لقصي بترقب
عدي
لا أوعى يكون اللي في بالي
قصي هو بعينه
مازن
يا حظك المنيل يا مازن حتى الكلمة مش عارف تقولها .. اه يانا ياما ياانا
اتنهد أدهم وقال
_أسود ... قدامكم ساعة تظبطوا نفسكم على ما العربية اللي هتأخدنا تجهز يلا مفيش وقت
إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
