قراءة رواية أسود الداخلية كاملة

تنشر حصريًا على مدونة رواية وحكاية قبل أي منصة أخرى

قراءة رواية أسود الداخلية

من روايات وقصص 

الكاتبة أسماء عبد الهادي

الفصل الواحد والعشرون

هنا عدي قرب من أدهم  وقال بغيظ

_ صدق بالله لو سمر فشكلت خطوبتها منك والله ما هلومها إنت إيه ياخي يخربيت كدا ..

أدهم 

_ عايز إيه إنت كمان هي نقصاك ..

عدي قال لمازن اللي كان واقف هينفجر من أخوه 

_ قابل ياعم مازن شوف كلامه ..

أدهم بحدة

 _ عدي أنا على آخري فخف ها ..

عدي 

_ وربنا أنا اللي على آخري منك أقول إيه غبي وربنا غبي .. 

أدهم 

_ عدي هزعلك .. 

عدي 

_ يا عم اسكت بقى ..بقى ياأخينا إنت دا أسلوب تكلم بيه خطيبتك أومال بعد الجواز هتحاورها إزاي هتجيبها من شعرها مثلاً والله مافاهم  ربنا يكون في عونها ..

أدهم 

_ إنت يعني مش سامع كلامها ..

عدي

 _ على فكرة سمر مغلطتش في ولا كلمة من اللي قالتها هي كان عندها وجهة نظر بتحاول  توصلهالك ..

لكن إنت دبش فعلاً وفهمت على مزاجك بدل ما تحاول تفهم قصدها كويس دوست زي القطر من غير فرامل وزعلتها أقول إيه بس يا أخي أقول إيه .. 

مازن

_ تعرف ياعدي والله سمر فعلاً مكنتش اتمناها لأخويا أدهم .. دا ميصلحش للجواز خالص مش بقولك دا مبيعرفش للرومانسية معنى .. 

مسكه أدهم من هدومه 

_ ولا إعدل كلامك لعدلك ..

مازن

 _ إبعد إيدك ياأدهم إحنا الحق علينا عايزين مصلحتك إنت بطريقتك دي مع سمر بتطفشها منك وإن كان في قلبها حاجة تجاهك إنت كدا بتعمل مليون حاجز وحاجز مابينكم لحد ماهتوصلها تفكر فعلاً إنها ترفض إن جوازكم يتم ..

أدهم بحدة

_ دا بعدها ولو حصلت هكسر دماغها كمان .. 

مازن

_ شوفت ياعدي البلوى دا أنا ماشي بدل ما أنفجر وأنا واقف

مشي مازن ووراه عدي 

فأدهم هز كتافه بمعنى إنه مش فاهم إيه اللي مضايقهم بالشكل دا 

في الوقت ده

قصي بلغ الشباب إن اللواء منتظرهم في مكتبه فالكل استعد علشان يخرج 

❈-❈-❈

أما عند سمر والبنات 

سمر فضلت تاكل في نفسها 

_ بجد دا إنسان مفيش عنده تفاهم ومش فاهمة دماغه دي متركبة إزاي ياباي عليه ..

لينا 

_ معلش ياسمر هوني عليكي إنتي يعني أول مرة تعرفي أدهم إنتي مش تايهة عنه ..

سمر

_ لا يالينا الوضع كدا زاد عن حده أنا مبقتش قادرة استحمله أنا خلاص بفكر أفشكل الخطوبة دي بقى أنا فعلاً زهقت .. 

منة

_استهدي بالله ياسمر تفشكلي إيه بس أنا متأكدة إنك بتحبي أدهم فبلاش تأخدي أي رد فعل في وقت غضب علشان مترجعيش تندمي .. 

سمر

_ لا يامنة حب إيه دا اللي هيكون بالاسلوب دا .. أنا بنظامه دا حياتي كلها معاه هتكون جحيم... أنا لحد دلوقتي مش عارفة أتفاهم معاه خالص ..

لينا 

_ إنتي معاكي حق ياسمر... لكن فشكلة خطوبتكم مش هي الحل صدقيني .. ممكن مثلاً توصلي فكرتك لقصي وهو يفهمه .. 

سمر 

_لا قصي أخويا مقدرش أتكلم معاه في حاجة زي دي أتكسف .. 

لينا

_ يابنتي دا أخوكي هتتكسفي من إيه بس إسمعي الكلام وكلميه وممكن كمان تقولي لقصي كتهديد لأدهم إنه لومغيرش طباعه معاكي إنتي هتفشكلي وصدقيني قصي هو أكتر واحد هيقدر يقفله .. 

سمر 

_ تفتكري يالينا إن دا الحل؟ 

منة 

_ جربي الحل اللي قالت عليه لينا وإن شاءالله الوضع هيتصلح ياسمر .. 

سمر اتنهدت بضيق

 _ ماشي هحاول

منه بحماس المهم خلونا نفكر في اللي كنا بنخططله يلا 

❈-❈-❈

في مكتب اللواء 

وقف الكل انتباه وأدوا التحية 

_ تحت أمرك ياسيادة اللواء 

اللواء 

_ استرح ياأسود ...

الكل قعد مكانه  

اللواء 

_ حمدالله على سلامتكم أتمنى تكونوا أخدتوا الإجازة الكافية 

عدي

_ الحمدلله يافندم إحنا في أتم الإستعداد لأي مهمة جديدة 

اللواء 

_ حيث كدا بقى ندخل في الجد لكن قبل ما اتكلم في أي حاجة حابب أعرفكم على العضو أو الأسد الجديد اللي هينضم ليكم 

كلهم بصوا لبعض بإستغراب 

قصي

_ عضو إيه يافندم إحنا طول عمرنا فريقنا معروف ومش بندخل أي فرق غريبة بينا ودا مش تكبر أو استبداد مننا لكن لأننا بالفعل مش محتاجين حد معانا وإحنا بفضل ربنا بنقدر نقوم بأي عملية بنفسنا وحضرتك عارف دا .. 

اللواء

 _ عارف دا ياقصي ومتفهم طبعاً سبب إعتراضك وعمري ماكنت هأمر أضيف لفريقك عضو جديد إلا إذا كنت شايف إنه هيكون عضو نافع فيها وهيفيدكم بالمعلومات اللي عنده ..

مازن

 _ بسيطة يافندم ممكن يقعد معانا ويقولنا اللي يعرفه وإحنا هنتصرف .. 

أدهم

 _ مازن عندوا حق... مش علشان عنده معلومات ندخله فريقنا مع إحترامي لكلام حضرتك طبعاً .. 

اللواء

 _ طيب نأجل كلامنا دا لحد ما تشوفوه وتتعرفوا عليه ..

قصي

_ دا الظاهر حضرتك مصر عليه بقى وكمان شكله حد مش عادي شايف في عين حضرتك لمعة فخر بيه ملهاش حد ..

إبتسم اللواء وقال 

_ دا حقيقي ياقصي هو فعلاً حد مش عادي وفخر كبير لبلدنا زيكم بالظبط وقام بدور كبير ومهم .. 

عدي 

_ مين دا يافندم إحنا نعرفه ..

اللواء 

_ من ناحية تعرفوه فإنتم تعرفوه ومتعرفهوش في نفس الوقت .. 

مازن

_ إسمه إيه أنا مش قادر أتخيل حضرتك تقصد مين بالظبط ..

اللواء

 _ هو ملقب عندنا هنا بالداهية لكن مش كتير اللي يعرفوه قلائل بس اللي يعرفوه ويتعدوا على الأصابع .. 

أدهم

 _ غريبة الإسم الحركي دا موردش عليا قبل كدا يافندم .. طب إسمه الحقيقي إيه .. 

قصي علشان ينهي الأسئلة دي 

_ إيه ياشباب كدا كدا هنشوفه وهنتعرف عليه فبلاش الأسئلة دي كلها .. 

اللواء

 _ أنا استدعيته وزمانه جاي في الطريق ..

شوية وخبط العسكري 

_ الباشا وصل يافندم ..

اللواء

 _ دخله بسرعة ياعسكري ..

العسكري تمام يافندم 

بص فريق الأسود بترقب للعضو الجديد اللي بيشيد بيه اللواء بنفسه وبيرشحه يكون من ضمن فريقهم .. 

فدخل شخص لابس قناع لا هو طويل ولا قصير ومتوسط الحجم كمان دخل وادى التحية من غير ماينطق بحرف ..

اللواء قال

_ بترحيب أهلاً أهلاً بالبطل المغوار نورتنا ..

هزله المقنع راسه بتحية

فقال اللواء 

_ طبعاً فرقة أسود الداخلية في غنى عن التعريف وأظن إنك عارفهم كويس ..

حط المقنع إيده على صدره كإشارة تحية ليهم من غير كلام .. 

أما فرقة الأسود بيدققوا النظر في المقنع عايزين يعرفوا مين ورا القناع دا وليه ساكت كدا وإيه الغموض اللي بيحيط بيه دا ..

اللواء

 _فرقة الأسود دا العضو اللي كنت بكلمكم عليه الداهية زي ما العقيد مسميه أتمنى تفقوا مع بعض علشان متأكد إنكم كتيم هتعملوا شغل جامد أوي .. 

الكل هز دماغه ما عدا قصي اللي بيبص للمقنع بغموض 

في الوقت دا جه إتصال للوا فقال 

_ تمام يافندم ماشي هبلغه مع السلامة ..

وبص للمقنع وقال

_ سيادة العميد عايزك ياريت تروحله حالاً وبكرة إن شاءالله تبتدوا شغلكم مع بعض ..

هز المقنع راسه ومشي 

اللواء قال 

_وإنتوا ياأسود اتفضلوا على شغلكم وبكره نكمل كلامنا فيبدوا إن المقنع هيكون النهاردة مشغول مع العقيد ..

خرجوا كلهم ووقفوا برا مازن هرش في راسه

 _ شباب حد فهم حاجة .. 

أدهم

 _ أنا مش مرتاح للمقنع دا ..

عدي

_ ولا أنا حاسس كدا إنه شايف نفسه زيادة عن الازم... لازمته إيه القناع ولا هيكون معانا بالقناع بردوا .. 

مازن

_ لا ودا كمان منطقش بحرف واحد أنا بصراحة مشوفتش كدا قبل كدا هو لو مغرور بس مش للدرجة دي ..

عدي

_ بس شكله واصل يالا العقيد عايزه في شغل يعني منستخفش بيه دا تقريباً ليه وزنه ..

هنا قصي قال بزهق 

_ أنا ماشي ..

لحقه أدهم 

_ إستنى ياقصي ماشي ليه بس خير ..

مردش عليه قصي وتابع طريقه 

فقال أدهم

 _ طب إستنى أنا جاي معاك ..

مازن وعدي

_ خدونا معاكم أساساً مفيش شغل النهاردة ..

ولما رجعوا كلهم البيت اتفاجئوا بأن البيت كله بلالين وزينه وفيه تورتة على الترابيزة وعصاير ومعجنات 

فمازن قال 

_ بفرحة الله عيد ميلاد مين دا ..

بصله قصي بحدة 

_ وإحنا من إمتا بنحتفل بأعياد الميلاد يافالح .. 

مازن

_ اه صح عندك حق أومال إيه البت لينا نجحت في الإمتحانات .. بس لا لسه الإمتحانات مبدأتش أصلاً .. أومال إيه بقى..

عدي 

_ ياخبر النهاردة بفلوس ..

في الوقت ده جت البنات

_ مفآجئة إيه رأيكم في المفآجئة دي 

مازن

_ هو دا الموضوع اللي كنتوا عايزني فيه .. 

لينا

 _ اه يامازن كنا هنستعين بيك تعلقلنا البلالين بس لما الخطة فشلت قمنا بدا بنفسنا وأديك شايف النتيجة ..

مازن

_  لا والله برافو عليكم ..

عدي

_ حاجة جميلة جداً تعبتوا نفسكم بس دا بمناسبة إيه ولا أنا برا الحسبة ..

لينا

_ لا طبعاً إنت بقيت واحد من العيلة برا الحسبة دا إيه بس .. 

عدي قال بفرحة

_ أنا مبسوط إنكم بتعتبروني واحد منكم ..

أدهم

 _ خف تعوم يازفت ماإنت واحد من العيلة من زمان لسه جاي تفتكر دلوقتي .. 

منة

 _ الحفلة دي عاملينها مخصوص علشان أبيه قصي ..

مازن مط شفته وقال

_ نعم لا دا إحتيال إشمعنا مخصوص لقصي وإحنا لا ليه ها هي كوسة طب حتى افتكري إني خطيبك ..

ضحكت منة فقالت سمر 

_ الحفلة دي عاملينها تعبيراً عن فرحتنا برجوع أبيه قصي لشغله ومهماته ولوقوفه على رجليه من تاني .. كلنا هنطير من الفرحة بسبب الخبر دا .. ولله الحمد والمنة ..

قصي إبتسملهم وقال وهو بيبص على أمه ومرات عمه 

_ آسف إني خبيت عليكم موضوع رجلي دا بس الموضوع كان عايز سرية تامة ولازم يبان كأنه طبيعي حتى أسودي ميعرفوش مافيش غير أدهم بس اللي كان يعرف بدا .. 

شكراً ليكم يابنات على إنكم فكرتوا في اللفتة الجميلة دي حقيقي ممتن ليكم ولمشاعركم الطيبة دي بجد ..

قربت منه سمر وقالت 

_ إنت تستاهل كل حاجة حلوة ياأبيه..

قصي ياحبيبتي ياسمر ..

سمر

 _ بس متفرحش أوي كدا إحنا هناخد منك حق كل الحاجات دي..

قصي رفع  حاجبه 

_ نعم ياختي ..

مازن ضحك

_ إلبس ياحلو ..

منة 

_ بصراحة ياأبيه  قصي إحنا مفلسين خالص فكلك مفهمومية بقى تعمر جيوبنا من تاني .. 

ضحك عدي

_حلوة دي تعملوا الحفلة على شرفه وتشيلوه الليلة كلها .. 

منة 

_ أينعم ..

لينا

_ احم ولسه كمان أوردر البيتزا 

وبصت لقص معلش ياأبيه قصي أصلي بحبها أوي .. قصدي كلنا بنحبها ..

ضحك قصي وبص لأدهم 

_ قابل ياعم دول عاملين الحفلة ليهم مش ليا وبيدبسوني بشياكة .. 

البنات ضحكوا 

_ دايما كدا قفشنا ياأبيه .. 

ضحك قصي

 _ ماشي ياسمر موافق هحاسب أنا على كل حاجة .. 

ضحكت سمر وحضنت قصي 

_ حبيبي ياأبيه هو أنا بحبك من شوية هات بوسة بقى..

أدهم في الوقت دا حس بالغيرة رغم إنه أخوها 

أدهم في نفسه

_ أول مرة أشوف سمر بالمرح دا والجرأة دي مع قصي وكأني بكتشف جانب جديد في شخصيتها... طب أنا متضايق ليه ما دا أخوها عادي يعني .. 

رجع كلم نفسه لا حتى لو أخوها ميصحش تعمل دا قدامنا ولازم أحاسبها على دا .. بس مش دلوقتي لما الفرصة تكون مناسبة .. 

هنا فاق أدهم على صوت عدي 

_ إنت يابني أقعد البيتزا وصلت 

أدهم فاق لنفسه ها ..

❈-❈-❈

وبعد إنتهاء الحفلة الجميلة دي 

البنات دخلوا يغسلوا الأطباق في المطبخ 

فلقت سمر أمها بتنادي عليها 

_ ياسمر 

سمر 

_ حاضر ياماما جاية .. 

ولما خرجت تشوف مامتها ملقتهاش 

_ هي ماما راحت فين 

قررت إنها تخرج من الشقة وتطلع فوق عند شقة عمها يمكن تكون أمها فوق 

لكنها اتفاجئت بأدهم في وشها بيعترض طريقها تجاهلته وجت تكمل طلوع السلم وقفها بلهجة آمرة 

_ إستني عندك ..

بصتله بإستغراب 

_ أفندم إنت بتكلمني أنا .. 

_ والله مش شايف حد غيرك هنا فأكيد يعني مش محتاجة ذكاء اه بكلمك إنتي ..

_ وأنا مشغولة دلوقتي طالعة أشوف ماما عايزاني في إيه ..

_ أنا اللي طلبت منها تنادي عليكي فاقفي هنا وكلميني .. 

_ إحنا مافيش بينا كلام ياأدهم ..

_ سمر اتعدلي معايا في الكلام أحسلك.. 

_ وأنا قلتلك مش عايزة أتكلم معاك هي عافية ..

_ بت إنتي متحاوليش تستفزيني .

_ أنا مش بحاول أستفزك إنت اللي مستفز لوحدك ويكون في علمك بقى أنا هكلم أبيه قصي علشان يفسخ خطوبتي منك ..

_ اه دا عند أم ترتر مش هيحصل الكلام دا ..

_ وأنا مش عايزة أكمل معاك أنا حره ..

_ كرريها تاني ياسمر وهكون مدشدش دماغك العنيدة دي .. 

_ أنا مش عنيدة ياأدهم إنت اللي التعامل معاك بقى صعب  وبصراحة الأسلوب دا  أنا مش راضية بيه فيكون في علمك يأما هتتغير يأما كل واحد يروح لحاله تمام ..

 بصلها شوية بغموض وقال 

_ اممم حلوة نبرة التهديد دي ..

_ بردو بتفهم على مزاجك دا مش تهديد ياأدهم أنا بقولك اللي هعمله لأني مش هستحمل الوضع دا أكتر من كدا ..

_ للدرجة دي شيفاني وحش ياسمر... دا أنا إبن عمك يعني عرفاني وعارفة أخلاقي كويس ..

_ أخلاقك لا يعلى عليها ياأدهم لكن طباعك طباعك أنا مش مستحملاها ومش حباها ..

_ طب ليه مش بتحاولي تغيريها .. 

_ أغيرها إزاي مع واحد معندوش تفاهم أصلاً وكل حاجة عنده بالحدة والعنف ..

_ طب إنتي اتكلمتي معاه ..

_ اتكلمت بس هو مش بيعطي فرصة لنفسه إنه يسمع بيقلب ويزعق على طول ..

_ مش يمكن توقيتك كان غلط أو إنك مش قادرة تفهميه كويس .. 

_ فعلاً أنا مش قادرة أفهمه وتعبت تعبت بجد ..قالتها وجت تطلع سلمة ودموعها خانتها ونزلت على خدها .. 

فقال أدهم 

_ إستني ياسمر ..

قالت بصوت متحشرج 

_ أرجوك مش عايزة أتكلم دلوقتي 

_ طب ممكن أفهم إنتي بتعطي ليه ما أنا بتكلم بهدوء ومش بزعق أهو .. 

_ مش بعيط ..

_ لا بتعيطي ياسمر وقلبي مش مستحمل دا ..