قراءة رواية أسود الداخلية كاملة

تنشر حصريًا على مدونة رواية وحكاية قبل أي منصة أخرى

قراءة رواية أسود الداخلية

من روايات وقصص 

الكاتبة أسماء عبد الهادي

الفصل التاسع عشر

مرام ركبت السفينة المحملة بالبضاعة اللي تبع أيهم علشان تخرج بيها برا مصر عن طريق البحر زي ما هو متفق عليه الرحلة هتستغرق في عرض البحر حوالي ٣ أيام بلياليهم  

إستعدت ولبست قناع الأفعى اللي معروفة بيه في المهمات اللي زي دي علشان محدش من البوليس يتعرف عليها 

وقفت أعلى السفينة بتأمن الحراسة المشددة عليها وبتتابع الطريق في البحر بالمنظار وقالت بصوت قوي لواحد من رجالتها

_ ها كل واحد في مكانه 

_ أيوة ياأفعى كل واحد مكانه زي ما طلبتي ..

_ تمام ممنوع حد يتحرك من مكانه إلا بإشارة مني وكله يحط عينيه في وسط راسه المهمة دي غير أي مهمة تانية مش عايزه غلطة

_ أوامرك ياأفعى 

هنا إتصل أيهم اللي هو أصلاً بيراقب تحركات أخته أول بأول 

_ ها يامرام الدنيا عاملة إيه عندك 

ردت بصوت قوي وكله ثقة 

_ الوضع تحت السيطرة متخافش مسألة وقت مش أكتر 

أيهم 

_ معتمد عليكي 

قفل معاها وكلم واحد من رجالته اللي مع مرام في السفينة 

_  ها يابني إيه النظام عندك 

_ الأفعى ياباشا حاطة خطة جهنمية ومأمنة السفينة بالكامل يعني لو أي حد اعترض طريقنا هيدمر تماماً .. وهي واقفة بنفسها تراقب الطريق ٢٤ ساعة 

إرتاح أيهم من اللي سمعه وقال في نفسه 

_ برافو عليكي يامرام 

على الجانب التاني 

إستعد قصي والأسود علشان في اللحظة المناسبة هيواجهوا الأفعى ويمسكوها 

ركبوا الباخرة بتاعتهم 

قصي قال 

_ ها ياأسودي مستعدين ... المهمة مش هتكون سهلة المعلومات اللي جتلنا إنهم مأمنين السفينة كويس أوي وأي غلطة ممكن نخرج منها خسرانين 

مازن بثقة 

_ عيب عليك نطلع خسرانين وإنت معانا بردوا 

قصي 

_ الغلط وارد من أي حد فينا أو من بقية الفريق فلازم نكون حذرين

عدي

 _ تمام ياباشا هنشرف بنفسنا على بقية البواخر اللي معانا 

قصي 

_ يفضل إن كل واحد فينا يكون في مكان بحيث نحاصرهم من كل مكان ومنعطيش فرصة لحد منهم  بالهرب بمعنى مش عايزين ثغرة واحدة يخرجوا منها 

أدهم

 _ كلنا على أتم الإستعداد ياباشا 

قصي بعين بتلمع 

_ مش هتفلتي من إيدي المرة دي ومتلبسة كمان 

❈-❈-❈

إستمرت الرحلة يوم كامل في عرض البحر 

 كان قصي خلالها بيخرج مع أدهم في بدل الغوص يستكشف أماكن ونقط الضعف عند سفينة مرام ومن غير إثارة الشبهات 

ولما خلصوا ورجعوا قلعوا لبس الغواصين 

قصي

 _ صحيح الحراسة مشددة وهي حاطة خطة متخرش المية لكن هنجيبها 

أدهم 

_ عددنا يفوقهم مرتين 

قصي

_ مش مهم العدد المهم تنفيذ الخطة بنجاح إحنا الأربعة بإمكانا إنهاء المهمة بنجاح لوحدنا 

أدهم 

_ طب ليه جبت العدد دا كله

قصي

_ علشان مش عايز أسيب أي فرصة للخسارة المرة دي ياأدهم 

أدهم 

_ إن شاءالله هننجح باذن الله 

قصي

_ إسمع أول ما السفينة تخرج من مصر وتعدي مينا الحدود ويجي وقت التوزيع على باقي الموردين التانين دا هيكون وقت هجومنا 

أدهم 

_ إنت بتقول إيه ياقصي أكيد كل واحد منهم هيكون متأمن كويس أوي 

_ وإحنا كمان متأمنين وزي ماقلتلك المهمة دي هنقدر عليها إحنا الأربعة بعون الله هي بس الأفعى تقع وكل حاجة هتبقى تمام بلغ الرجالة يستنوا الإشارة مني وارجع على باخرتك 

أدهم 

_ تمام ياوحش 

❈-❈-❈

ايهم إتصل بمرام 

_ مرام إيه الأخبار عندك 

مرام وهي بتبص في المنظار 

_ خلاص الليلة هيتم التوزيع للموردين وكله هينتهي كلها كام ساعة ونوصل 

_ خذي بالك سمعت إنكم متراقبين وخلاص بيقربوا منكم

مرام بمكر 

_ عاملة حسابي ليهم خليهم يقربوا أكتر ويحفروا قبرهم بإيديهم

 ومرت  الساعات وخلاص حانت اللحظة الحاسمة وتم توزيع البضاعة بين الأربع باخرات اللي من دول مختلفة وأثناء التوزيع 

وقفت مرام تتابع كل شاردة وواردة بتحصل وعملت إعادة لتوزيع رجالتها

_ إنت خذ رجالتك وبدل مكانك مع زميلك... وإنت كثف المراقبة هنا مش عايزة ولا غلطة 

❈-❈-❈

أما عند قصي فقال 

_ ياأسود حانت اللحظة الحاسمة مش عايزيكم ترحموا حد والأفعى لو هتجيبوها ميتة ميهمش المهم المهمة ننجح مفهوم 

الثلاثة وقفوا بثبات 

_ مفهوم ياوحش 

قصي 

_ لا إله إلا الله 

الكل :محمد رسول الله 

قصي

_ ربنا معانا ياشباب الله أكبر الله أكبر 

بدأ هجوم  الأسود على كل المهربين في السر لحد ماوقع منهم معظمهم من غير ما الأسود يخسروا فرد واحد من رجالتهم 

قصي قال عبر اللاسلكي

_ أحسنتم ياأسود الله ينور انتشروا في البواخر اللي استوليتم عليها وقوموا بدورهم يلا 

أدهم

 _ علم ياوحش 

❈-❈-❈

مرام حست بحركة غريبة فبصت قدامها لقت أيهم 

فتحت عينيها بإستغراب 

_ أيهم ؟؟ 

أيهم 

_ مكانش ينفع مجيش في مهمة زي دي .. إيه مالك اتضايقتي من وجودي 

مرام 

_ لا في حاجة غريبة بتحصل 

أيهم 

_ حاجة إيه كل حاجة شايفها ماشية تمام 

مرام

_ دا ظاهرياً بس 

أيهم

 _ قصدك إيه 

_ في حاجة أنا مش فهماها السفينة كانت متحاوطة برجالة الأسود وكانوا تقريباً خمس باخرات محاوطينا 

أيهم 

_ إنتي عارفه دا وساكتة لهم 

مرام

_ أنا منتظراهم يهجموا ومستعدة ليهم 

أيهم

 _ أنا وأنا جاي مشفتش أي باخرة قريبة 

_ أيوة ما دا الغريب إنهم انسحبوا كلهم ومش عارفه خطتهم إيه 

أيهم ظهر عليه التوتر 

فجأة مرام صرحت بقوة 

_ إيه!!! ... دا فخ إحنا في خطر ياأيهم ...يخربيت دماغك ياقصي خطة ذكية فعلاً 

أيهم بلع ريقه 

_ في إيه يامرام 

لسه مرام هترد 

_ في إننا محاصر....

فجأة سمعوا تبادل إطلاق نار 

فأخذ مرام وأيهم كل منهم ساتر 

وأيهم قال بذعر 

_ في إيه 

مرام

_ في مصيبة بتحصل ياأيهم ... رجالة الأسود هنا على السفينة 

أيهم بصدمة

_ إيه إزاي دا يحصل وإنتي كنتي فين 

_دا اللي مش فهماه وهتجنن وأعرفه أنا عيني مغفلتش لحظة ياأيهم ورجالتنا تقريباً كلهم في أماكنهم

أيهم 

_ دا صحيح ورجالتي كمان ومحدش رصد أي حركة غريبة 

وقفت مرام ومسكت سلاحها وقالت بقوة 

_ مهما عملوا بردوا أنا مستعدة ليهم .. أيهم اجهز وجهز رجالتك 

لكن أيهم كان عارف قوة الأسود كويس وعلشان متأكد إنهم مش هيتهاونوا معاه بالذات بعد اللي كان ناوي يعمله في أدهم استدعى الهيليكوبتر بتاعته وقال وهو بيهرب بس مش بيبين دا 

_ أنا هخلي رجالتي تستعد وقومي إنتي بالواجب أنا واثق فيكي 

مرام فهمت إنه بيهرب بشياكة وعرفت قد إيه هي مش مهمة خالص عنده وإن اللي يهمه نفسه ومصلحته بس 

لكن دا مأثرش عليها لأنها خلاص اتخلت عن أي عواطف من بعد ماقتلت سليم 

وقالت لرجالتها

_ إستعدوا قدامنا ليلة طويلة النهاردة

 وبدأ الكل يتوتر وساد الهرج والمرج على السفن وبدأ تبادل إطلاق النار بين الأطراف كلها مرام ورجالتها والأسود من كل البواخر اللي استولوا عليها 

شافت مرام رجالة كتير بتقع من على البواخر التانية فقالت بخبث 

_ بقى دي خطتكم استوليتم على المهربين تمام أوي مش هسيبكم 

في الوقت دا أيهم كلمها وهو في الهيليكوبتر ومتابع اللي بيحصل من بعيد 

_ إيه الأخبار 

مرام بثقة

_ هصفيهم كلهم وقعت منهم كتير ياأيهم 

وفجأة زاد إطلاق النار فصرخت مرام 

_ لااااا الأسود ياأيهم شكلها مش بتهزر المرة دي وكلهم متحدين وكمان قصي معاهم 

أيهم بصدمة

 _ إيه قصي العاجز معاهم إزاي 

_ معرفش ابعت دعم بسرعة إحنا كدا هنتصفى 

_ هبعت الدعم من مصر إزاي وإحنا برا مصر .. اصبري هكلم حد من رجالتنا هنا 

_ بسرعة ياأيهم مفيش وقت...

وفجأة مرام عينيها برقت لما لقت أدهم ومازن وعدي بيشاور لها 

_ لا مش ممكن 

أيهم برعب

_ دول ناوين على إيه 

فجأة ظهر قصي وقال وهو بيرمي قنبلة ناحية مرام 

_ محدش يلعب مع الأسود ويخرج سليم 

جت مرام تنط في المية لقت الأسود بيضربوا عليها وأيهم كمان شاف هيلكوبتر غريبة بتقرب منه فاضطر إنه يهرب بعيد بالهليكوبتر اللي راكبها 

_ إبعد من هنا بسرعة أوعى تكون في مرمى الهيليكوبتر اللي بتلاحقنا دي 

بقت مرام محاصرة ومقدرتش تتحرك في أي مكان 

_ لا مش معقول تكون دي نهايتي لاااااا  

لحد ما القنبلة انفجرت في السفينة كلها وبقت أشلااااء ومفيش فيها ولا قطعة سليمة غير شظايا نار وكل اللي فيها تم القضاء عليه 

ولما بص أيهم للسفينة انصعق

_ لاااا مش ممكن دا يحصل مراااااااام.. البضااعة .. لااااااا 

قالها 

وخلى الطيار يبعد بسرعة عن المكان وقلبه حزين على فقد مرام ورجالته 

_ ماشي ياأسود كسبتم المرة دي كمان لكم بردوا مش هتعرفوا تمسكوني 

وكلم ناس تبعه تقف للأسود وتدور على أي حد عايش يمكن مرام تكون عرفت تهرب لكن كل اللي بعتهم بردوا محدش منهم رجع أبداً 

أيهم برعب 

_ لا أنا مش هينفع أنا مش هينفع أقعد في مصر ثانية واحدة بعد النهاردة أنا هروح ألم كل حاجتي وأوراقي وأمشي من هنا بأي طريقة 

وكلم واحد تبعه 

_ ظبطلي باسبور في ظرف ساعة من دلوقتي بسرعة 

_ أوامرك ياباشا 

❈-❈-❈

أما عند الأسود فمدوا ايديهم في إيدين بعض بفرحة لنجاح المهمة

بعد ما راجل منهم بعته قصي يدور في البحر على مرام رجع من مهمة البحث وقال

_ ملقيناش ليها أي أثر إلا البقايا  دي ياباشا 

وكان ماسك الجاكيت اللي كانت لابساه وفيه دم وقطع لحم متقطعة

 فقال أدهم بفرحة

_ نجحنا ياأسود 

قصي

 _ أحسنتم ياأسودي عملناها يارجالة تم القضاء على الأفعى بنجاح 

مازن سجد في الأرض 

_ الله أكبر الله أكبر 

عدي 

_ بس أيهم مشي 

قصي بمكر

_ لا دا رايح لقضاه برجليه 

إبتسم عدى بفرحة واتنهدوا كلهم براحة

قصي قال بأمر للرجالة 

_ جمعوا كل البضاعة في باخرة علشان نرجع بيها ونسلمها للمختصين وأمنوها كويس واستعدوا لأي هجوم طارىء في طريق العودة لأني متأكد إن أتباع المهربين دول هيطاردونا ومش هيسكتوا 

مهمتنا لسه مخلصتش لحد كدا ياشباب ... لكن  خلص الجزء الأصعب منها 

وباقي الرجالة اتأكدوا إن رجالتنا كويسين وشوفوا الإصابات وارجعوا يلا حالاً 

وبالفعل طوال الطريق كان بيعترضهم كتير منهم لكن الأسود وبقية الفريق كانوا واقفينلهم بالمرصاد وقدروا يتغلبوا عليهم كلهم لحد ما وصلوا المينا في مصر بأمان 

أدهم أمر فرقة من فريقه إنهم يأمنوا الطريق للفرقة اللي معاها البضاعة لحد ما توصل للسلطات بسلام 

_ عدي ومازن إنتوا هتكونوا ضمن الفرقة دي مش ضامنين إننا نتعرض لهجوم هنا في مصر وأكيد أيهم مش هيسكت 

عدي ومازن رغم التعب اللي حل عليهم إلا أنهم معترضوش خالص 

_ تمام ياأدهم هنقوم بالمهمة 

أما أدهم وقصي راحوا على الوحدة وهناك قابلوا اللواء اللي كان في انتظارهم 

وأول ما شافهم قام وقف وقال بفرحة 

_ حمدالله على السلامة ياأسود .. ربنا يباركلي فيكم وتقضلوا دايما رافعين راسي

أدهم

 _ كنت مفكر إننا هنكون أول ناس بنبشرك بخبر نجاح المهمة بس الظاهر إن في حد سبقنا وعمل دا 

اللواء 

_ البشاير وصلتني من بدري  

قصي بغموض

_ وياترى من مين بقى رغم إن المهمة دي كانت سرية جداً ومحدش يعرف بيها غيرنا فمين اللي قدر يوصل معلومة زي دي لحضرتك 

اللواء بنفس الغموض 

_ مش كل حاجة لازم تكون واضحة ليك ياوحش ولا إيه 

قصي بهدوء

_ صحيح ياباشا 

اللواء رجع قعد مكانه 

_ وأخيراً تم القضاء على أسطورة الأفعى التي لا تقهر 

أدهم 

_الحمد لله يا فندم 

اللواء 

_ عندي ليكم خبر حلو إن شاءالله هبلغكم بيه بعد الإجازة

قصي 

_ إجازة إيه ياباشا ولسه أيهم متمسكش 

اللواء

 _ إنتوا بقالكم ٣ ليالي تقريباً من غير نوم وبذلتم مجهود بدني جبار وأنا مش مستعد أخسر رجالتي بسهولة كدا 

أيهم هيجي عليه يوم وهيتمسك لكن صحتكم عندي أهم وعامة متقلقش رجالتنا بتابعه ٢٤ ساعة 

أدهم 

_ النيلة دا  زي الحرباية دا بيتشكل لمليون نسخة ونسخة مختلفة 

اللواء 

_ بعد موت الأفعى اللي هي كانت الأساس في كل عملياته هو ولا حاجة مجرد بوء على الفاضي 

قصي

_ دا حقيقي بس إبن الإية دا معاه كل الأسرار ويعرف كل فروع الموردين برا مصر يعني داهية

اللواء 

_ وأنا واثق في أسودي إنهم هيجيبوه في يوم من الأيام.. علشان كدا بقولكم خدوا إجازة ريحوا يومين وارجعوا علشان الخبر اللي هقولكم عليه 

قصي جه يعترض 

_ بس يافندم 

اللواء شاورله 

فسكت قصي وأدى التحية هو وأدهم وانصرفوا لبرا الوحدة 

❈-❈-❈

في الوقت دا رجع مازن وعدي 

مازن 

قصي بالله عليك اطلبلنا أجازة أنا هموت وأنام 

قصي بمكر 

_ وإن قلتلك مفيش أجازة هتعترض 

مازن

_ مقدرش أعترض لكن هفضل أدعي على اللي في بالي لأني متأكد إنه السبب 

قصي كشر

_ بقى كدا طب أنا هدخل الغي أجازتك إنت بالذات 

مسك مازن إيده 

_ لا بالله عليك أوعى تعملها... أدعي عليك إيه دا أنا هدعيلك .. روح يا شبخ الهي تلاقي بنت الحلال اللي تلين راسك دي شوية وتشغلك عننا 

مط قصي شفته 

_ إنت كدا بتدعيلي يازفت

عدي وأدهم ضحكوا 

مازن 

_ إيه بدعيلك تتجوز كدا بدعي عليك ؟؟

عدي وهو بيضحك 

_ قصي شكله مخرج الموضوع من دماغه 

قصي

_ والله أبداً 

أدهم اتفاجىء باللي قاله قصي فحاوط  بإيده رقبة قصي 

_ أوبا الوحش بيفكر في الموضوع ياجدعان يبقى دق ناقوس الخطر وهينفجر في أي لحظة اهربوااا 

والثلاثة جريوا من قدام قصي وهما بيضحكوا عليه 

قصي بغيظ 

_ اه إنتوا بتعملوني اشتغالتكم.. طب كويس إنكم عملتم الصح وهربتم علشان لو وقعتوا في إيدي 

عدي وهو بيجري 

_ عارفينه الطور دا لما يهيج بيطيح ومبيعرفش يفرق 

أدهم 

_ اه وربنا بيطيح زي الخرطوش 

قصي بشر 

_ بقى  كدا طب استلقوا وعدكم 

مازن وهو بيجري

_ لا لا ياوحش وربنا أنا متكلمتش

قصي وهو بيجري وراهم 

_ إنت .. دا إنت أس المصايب

مازن وهو بيجري بكل سرعته

_ وربنا كان غرضي أدعيلك إنت اللي قلبت الموضوع جد أنا مالي بقى 

عدي 

_ إنت بتقول إيه مش هيسمعك الطور هاج خلاص 

قصي بغيظ 

_ عدددي موتك على ايددداي 

ركب عدي عربيته وطار بيها وكمان أدهم ومازن 

ووراهم قصي بعربيته 

وساقوا كلهم بأقصي سرعة وكأنهم في سباق 

وصل عدي وطلع على شقته وقفل الباب وراه 

مازن خبط على الباب 

_ افتح يالا يخربيتك دا طالع ورانا 

عدي براحة 

_ لا أنا عايز أنام يالا أشوفكم بعد أسبوع لما أفوق من سباتي 

مازن وهو بيبص وراه 

_ بقى كدا بتبيعني ياعدي ماشي لما أشوفك 

وفضل يتسحب وهو نازل على السلم ولما لقى الجو أمان دخل شقتهم وعلى أوضته على طول وقفلها كويس وهو بيقول 

_ أدهم ياخويا ربنا يتولاك بقى برحمته معلش بقى ياخويا العمر واحد ودا الوحش منقدرش نقف قصاده 

أما تحت أدهم كان طالع جري لكنه شاف حاجة خليته يتسمر في مكانه ونسى خوفه من الوحش واتيبس في مكانه...