الحلقة السابعة عشر (عيد الهالوين) - سلسلة أماكن مسكونة
الحلقة السابعة عشر
عيد الهالوين
مينفعش نبقى بنتكلم عن الرعب والأماكن المسكونة ويجي عيد الهالويين ومتكلمش عنه دي تبقى عيبة في حقي وربنا.
تعالوا أحكيلكم شوية عن الهالوين وإيه حكايته؟ وإزاي بدأ الاحتفال بيه؟ وإيه هي أهم الحوادث الغريبة اللي حصلت في اليوم ده.
العالم كله بيحتفل بالهالوين يوم ٣١ أكتوبر من كل سنة وخصوصا في أوروبا وأمريكا بتلاقي الناس كلها بتشتري قرع العسل والحلويات وبيلبسوا الهدوم التنكرية وخصوصا المرعبة ومش بس كدا دول بيعملوا مكياج مرعب ويمشوا بيه في الشوارع كمان وعندهم اعتقاد إنهم كدا بيخوفوا الأرواح الشريرة وبيبعدوها.
بنشوف الأطفال الصغيرة وهي لابسة اللبس التنكري وماسكة في إيدها سلة صغيرة وبتلف عالبيوت وتقول للناس حلوة أم خدعة (Trick or treat) وتاخد الحلويات من الناس واللي ميرضاش يديلهم يرموا عليه تعويذة في اعتقاد منهم إن الأرواح الشريرة هتنتقم منهم.
كمان بنشوف ثمار قرع العسل وهما نحتينها بأشكال مرعبة وحاطين فيها الشموع علشان تنور قدام البيوت والشباب اللي واقفين في الطرق وبيحدفوا الناس والعربيات بالبيض وغيرها وغيرها من مظاهر الإحتفال.
طب إيه حكاية الهالوين دي؟ وبدأ من إمتى؟ تعالوا أقولكم.
❈-❈-❈
معظم الآراء بتقول إن كلمة هالوين "Halloween" هي كلمة مسيحية جاية من كلمة "Hallowed" واللي معناها مقدس باللغة الإنجليزية وهي اختصار لجملة "All Hallows’ Even" ودي معناها كل ما هو مقدس وكمان متاخدة من كلمة قديس "Halomas" وبكدا يكون معنى كلمة هالوين "Halloween" يعني عيد القديسين.
الكلام ده على حسب الديانة المسيحية لأن عيد الهالوين ده بيسبق عيد القديسين بيوم، الهالوين ٣١ أكتوبر وعيد القديسين ١ نوفمبر وكانوا بيحتفلوا بيه زيه زي غيره من الأعياد الدينية التانية زي عيد الفصح مثلا فكانت الطقوس عبارة عن الصلاة على أرواح اللي رحلوا سواء قرايب او قديسين أو شهداء وكانت الناس بيحطوا الورد على صور الموتى أو يزوروا قبورهم وخلاص على كدا لحد ما اتحرف العيد ودخلت فيه الأفكار الوثنية وبقى زي ما بنشوفه دلوقتي.
رأي تاني بيقول بقى إن العيد ده بدأ الاحتفال بيه من ٢٥٠٠ سنة وكان العيد عبارة عن مهرجان سلتي كبير إسمه "مهرجان سوين" وبيحتفلوا فيه بعيد رأس السنة السلتية وكانت الاحتفالات دي في إنجلترا وأيرلندا وشمال فرنسا والعيد ده بيرمز لانتهاء فصل الصيف وبداية فصل الشتاء اللي وفقا لمعتقداتهم فإن فصل الشتاء كان لما بيجي بتيجي معاه الأرواح الشريرة وعلشان يتقوا شرهم كانوا ببولعوا النار حوالين البيوت ويلبسوا الهدوم المخيفة علشان يبعدوا الأرواح دي عنهم.
(على أساس الأرواح هتخاف منهم وكدذة)
يعني من الآخر العيد ده كان مرتبط بالطقوس الغريبة والقوى الخارقة للطبيعة والتنبؤ بالمستقبل وامتى الواحد هيتجوز وامتى هيموت وما إلى ذلك من تخاريف.
رأي تالت بيقول إن العيد ده أصله عيد كيلتي إسمه "سامهاين" وسامهاين ده هو إسم إله الموت على حسب عقيدتهم والعيد ده بيرتبط ببداية البرد والظلام لما الليل بيطول والنهار بيقصر فحسب معتقداتهم إن إله الشمس بيقع في أسر الموت والظلام يوم ٣١ أكتوبر وفي الليلة دي أرواح الأموات بتتجول في ملكوتها وبتحاول تنزل الأرض وترجع تاني عالم الأحياء.
في الليلة دي بقى كان الكهنة "الدارويديون" ودول كهنة أتقياء في بلاد الغال القديمة و بريطانيا و أيرلندا كانوا بيعملوا عيد كبير جدا وكانوا بيؤمنوا إن إله الموت سامهاين بيقوم في الليلة دي ويدعي كل الأرواح الشريرة اللي ماتت خلال السنة واللي كان عقابها إنها تستأنف حياتها في أجساد الحيوانات وعلشان كدا الناس كانت بتخاف جدا ويعملوا الطقوس بتاعتهم اللي كانت عبارة عن مشاعل ضخمة بيحطوها قدام البيوت ويفضلوا طول الليل صاحيين بيراقبوا الأرواح دي علشان متدخلش بيوتهم وتستولي على أجسادهم ومن هنا بدأت الأفكار اللي بتقول إن الأرواح الشريرة وأرواح الساحرات بتتجول في الأرض ليلة الهالوين.
طبعا كتير من المسيحيين كانوا بيرفضوا الإحتفال بالعيد ده لأنه في اعتقادهم عيد وثني بس بمرور الوقت اختلط الحابل بالنابل والناس مبقتش تفرق بين الأعياد الوثنية والدينية ودخلوها في بعضها.
❈-❈-❈
من أهم المظاهر الموجودة في الهالوين زي ما قولت في أول القصة هو استخدام قرع العسل كمصابيح وبيسموه مصباح جاك
طب حد يعرف ليه بيعملوا كدا؟ وليه إسمه مصباح جاك؟
الأسطورة بتقول إن كان فيه واحد كسول جدا إسمه جاك كان بيرتكب كل الآثام اللي تتخيلوها ومتتخيلوهاش سكر وقطع طريق وزنا وسرقة وقتل وكل ما تتخيلوه من شرور وطبعا هو كان عنده يقين إن كل الحاجات اللي بيعملها دي سببها وسوسة الشيطان.
قرر جاك التوبة وقرر إنه يعمل مقلب في الشيطان قام استدرجه واقنعه إنه يطلع فوق شجرة ولما الشيطان طلع فوق الشجرة حفر جاك صليب في جذع الشجرة وهنا اتخض الشيطان بقى وفضل متعلق فوق الشجرة مش عارف ينزل.
لما مات جاك طبعا معرفش يدخل الجنة بسبب أعماله المهببة ولما جه يدخل النار برضو معرفش بيقولولك قال إيه الشيطان منعه إنه يدخلها ومن هنا اتحكم عليه إنه يفضل كدا متعلق ولا طايل جنة ولا نار وعلشان ميمشيش في الظلمة خد قبس من نار جهنم ينور بيه طريقه.
وفيه اللي بيقول إن جاك هو اللي مكانش عايز يدخل جهنم وخدع الشيطان أكتر من مرة علشان ميعرفش يدخله النار وبقى جاك هائم في الأرض ولا طايل جنة ولا نار وقالوا كمان إنه مخدش قبس من نار جهنم ولا حاجة كل الحكاية إنه جاب فحمة مولعة وجاب ثمرة لفت وجوفها وحط فيها الفحمة علشان تنورله طريقه.
لما جه أول عيد هالوين بعد موت جاك الناس جابت جزرة أو لفتة وعملوا زي جاك بالظبط جوفوها وحطوا فيها شعلة من نار تيمنا بقصته وسموها مصباح جاك ولما بدأ الأمريكان يحتفلوا بالهالوين وكان وقت الاحتفال ده بيواكب موسم حصاد اليقطين أو قرع العسل استبدلوا الجزر واللفت بالقرع ومن هنا ظهر مصباح القرع وبرضو فضلوا مسميينه مصباح جاك ومن ساعتها مصباح القرع بقى رمز أساسي من رموز الإحتفال بالهالوين واتنقل من أمريكا لكل دول العالم.
أكتر بلد اهتمت بالهالوين هي الولايات المتحدة الأمريكية اللي بدأ الإحتفال بالعيد ده فيها في القرن ال ١٩ لما بدأ الأيرلنديين يهاجروا لهناك وبدأوا يمارسوا طقوس احتفالاتهم وشوية شوية بدأ الأمريكان يقلدوا الأيرلنديين ويحتفلوا بالهالوين هما كمان.
الاحتفال الأول كان عبارة عن تجمع عائلي في البيوت ويحيوا ذكرى الأموات وخلاص بس سنة ورا سنة بدأوا يضيفوا طقوس جديدة عالإحتفال.
في التلاتينات بدأ الهالوين يتحول لاحتفال مرح واجتماعي وتخلى تماما عن نزعته الروحانية والدينية.
بدأوا بقى يدخلوا الأطفال في الاحتفالات ويلبسوهم الهدوم التنكرية ويلففوهم عالبيوت علشان يطلبوا الحلويات وشوية شوية بقى الهالوين ظاهرة كاملة ليه طقوسه خصوصا بعد دخوله لعالم السينما الأميركية وتم إنتاج أفلام كتير جدا بتتكلم عن العيد ده ومعظمها أفلام رعب ومن هنا تحول الهالوين من عيد القديسين لعيد الهلع المعروف دلوقتي.
الهالوين دلوقتي بقى يوم احتفال عالمي وعطلة رسمية بتقفل فيه كل المؤسسات علشان الناس تحتفل بيه وبيتم تزيين الشوارع والبيوت باليقطين وبتحتفل بيه كل الطوائف والأديان هناك والناس كلها بتلبس الهدوم التنكرية المرعبة ويعملوا مكياج مرعب في اعتقاد منهم إن الأرواح الشريرة مش هتتعرف عليهم وبقى عندهم اعتقاد إن في ليلة العيد بتنزل الأرواح الشريرة من عالم البرزخ للأرض وبتفضل لحد طلوع الفجر.
ومن ضمن الطقوس في أمريكا انتشار السرقات الخفيفة زي القطع الخشبية والأبواب وغيرها من الحاجات البسيطة علشان يوهموا الناس أن الأرواح الشريرة موجودة فعلا وهي اللي بتسرق الحاجات دي وبما إن الهالوين بيجي في فصل الخريف اللي ورق الشجر بيقع فيه وصل بيهم الحال إنهم يقولوا إن الأرواح هي اللي بتوقع أوراق الشجر في الوقت ده من كل سنة.
❈-❈-❈
معظم دول العالم بتحتفل بالهالوين وبتشترك في معظم الطقوس بتختلف في حاجات بسيطة جدا بس كلهم بيتفقوا في اللبس التنكري ومصابيح اليقطين.
إنما بيختلفوا في إن بعض الدول لسة محتفظة بروح الهالوين الحقيقية وهي إحياء ذكرى الموتى فبيحتفلوا بوضع الورود والأكل على صور موتاهم وفيه بعض المسيحيين اللي بيرفضوا الإحتفال بالعيد ده باعتباره عيد وثني مالوش علاقة بالديانة المسيحية.
عندنا في مصر بقى مكانش حد مهتم بالهالوين أو الاحتفال بيه لحد من كام سنة فاتوا لما بدأ بعض الشباب المتأثرين بالثقافات الغربية عامة والأمريكية على وجه الخصوص بالإحتفال بيه وبدأوا يدوروا عالأماكن السياحية اللي بتقدم برنامج خاص بالهالوين.
كمان بعض المدارس الدولية اللي بتتبع في سياستها سياسة البلد اللي المدرسة تابعة ليها بدأوا يحتفلوا بالهالوين هما كمان وبدأت إدارة المدارس دي تطلب من أولياء الأمور هدوم تنكرية خاصة بالإحتفال باليوم ده وبقوا يعملوا حفلات للهالوين في قلب المدرسة.
في نفس الوقت فيه ناس كتير بترفض الإحتفال بالعيد ده وبيهاجموه وبيعتبروه مخالف لمجتمعنا ومعتقدادتنا الدينية وبيئتنا وفي عالم موازي في ناس متعرفش حاجة عن العيد ده ولا سمعت عنه قبل كدا.
مينفعش نبقى بنتكلم عن الهالوين ومنتكلمش عن الحوادث الغريبة اللي حصلت في اليوم ده واللي معظمها كانت بسبب الهالوين نفسه واتسببت لكوارث لناس كتير جدا معظمهم فقدوا حياتهم بسبب الإحتفال بالعيد ده ومعظمهم كمان بدأت الحكاية معاهم بضحكة وقلبت بكارثة تعالوا معايا احكيلكم أمثلة من الحوادث دي.
- ٣١ أكتوبر سنة ١٩٢٢م اقتحم آلاف الرجال لابسين قمصان سودة ساحة “بيازا ديل كورينالي في روما” والرجالة دول كانوا جزء من الحزب الفاشي وكانت دي الطريقة اللي استولى بها بينيتو موسوليني على الحكومة بالعنف وبقى في النهاية رئيسا للوزراء وديكتاتور بعد كدا يعني يعتبر يوم الهالوين هو شرارة البداية لحكم موسوليني.
- ٣١ أكتوبر ١٩٢٦م توفى الساحر الشهير هاري هوديني
بعد إصابته بانفجار بالزائدة الدودية اللي حصل إن هوديني كان بيقدم عرض في مونتريال ومن ضمن العرض إن يقوم مجموعة من الشباب ويتطوعوا إنهم يضربوه في بطنه علشان يوريهم إن عضلات بطنه قوية جدا ومبتتأثرش بأي ضرب بس واحد من المتطوعين دول ضربه ضربتين ورا بعض في مكان الزائدة الدودية وبالفعل محسش هوديني بأي وجع وقتها كمل العرض للآخر.
بس الغريب إن بعد إنتهاء العرض ونزول الستارة مباشرة وقع هوديني عالأرض وحس بوجع رهيب وعلى ما وصل المستشفى كان مات وقال الدكاترة إن حصله إنفجار في الزائدة الدودية نتيجة الخبطتين اللي خدهم.
بس فيه ناس بتقول إن مش ده سبب وفاته وإنه اتقتل بحيلة من واحد من السحرة المنافسين ليه.
- ٣١ أكتوبر ١٩٣٨م حصل قطع للإرسال في راديو ال "سي بي إس" في أمريكا وتمت إذاعة خبر بيقول إن الكائنات الفضائية غزت نيوجيرسي وطبعا الناس هاجت وماجت وسادت حالة من الذعر بينهم.
بس في الحقيقة مكانش فيه كائنات فضائية ولا بتنجان دي كانت مسرحية إذاعية والمسرحية كانت بتحكي عن غزو الفضائيين لنيوجيرسي وكان إسم المسرحية "حرب العوالم" بطولة الممثل والمخرج والكاتب المسرحي "أورسون ويلز"
الغريب إن ناس كتير صدقت الخبر وافتكروا ان فيه هجوم فضائي بجد لدرجة إنهم لما عملوا إحصائية طلع واحد من كل ١٢ شخص من اللي سمعوا المسرحية صدقوا إنه هجوم فضائي.
- سنة ١٩٥٨ وفي ليلة الهالوين واحد ومراته كانوا بيستعدوا للنوم لما رن جرس البيت راح الزوج يفتح الباب بس اتفاجئ بواحد لابس لبس تنكري ورافع في وشه مسدس وضربه طلقة في دماغه.
بعد عمل التحريات اكتشف رجال البوليس إن الراجل ده يبقى عشيق الزوجة اللي اتفقت معاه يستغل الهالوين علشان يقتل جوزها ويخلالهم الجو مع بعض.
- سنة ١٩٦٣م وفي عيد الهالوين اتسبب انفجار غاز البروبان في معرض للتزحلق على الجليد في ولاية إنديانا الأمريكية في قتل ٧٤ واحد دا غير المصابين اللي كان عددهم ٤٠٠ مصاب وكتب عن الحادثة دي مراسل مجلة إنديانا بوليس ستار "ريتشارد آر روبرتس" وقال في وصفه عن اللي حصل:
” لقد دخلت في كابوس وكان هذا أسوء شيء رأيته منذ القتال في الحرب العالمية الثانية”
- سنة ١٩٧٤م واحد إسمه "زونالد كلارك" كان ساكن في ولاية تكساس قام بتقديم الحلويات المسمومة بالسيانيد لأولاده وكان عددهم ٣ ولد وبنتين وعلشان يغطي على جريمته قدم الحلويات لأربعة كمان من أطفال الجيران.
زونالد كان عليه ديون كتير فقرر يتخلص من ولاده بالطريقة دي علشان يقبض مبلغ التأمين اللي كان عامله على حياتهم بس لسوء حظه مفيش إلا ابنه بس اللي أكل من الحلويات دي ومات بعد ساعة واحدة من أكلها.
تم القبض على زونالد واتحكم عليه بالإعدام وتم تنفيذ الحكم سنة ١٩٨٤م.
- في ليلة الهالووين سنة ١٩٨٢م واحد إسمه مارفين براند لاند كان عنده ٦٩ سنة كان هو ومراته بيوزعوا الحلويات على الجيران بمناسبة الهالوين ولما رجعوا بيتهم وأول ما فتحوا الباب لقوا واحد مقنع ماسك مسدس وبيهددهم علشان يسرق فلوسهم بس مارفين أفتكر إن الموضوع مقلب من مقالب الهالوين ولما الحرامي طلب الفلوس وحاول يحبسهم في قبو المنزل قاومه مارفين ودا اللي خلى الحرامي يضربه بالرصاص ومات مارفين في الحال وبعد كام شهر حصلته مراته حزنًا عليه ولحد دلوقتي محدش عارف مين القاتل.
- سنة ١٩٩٠م شاب صغير عنده ١٧ سنة إسمه جويل حب يعمل مقلب في اللي شغالين عنده في البيت عمل نفسه مشنوق وكان كل ما حد يعدي قدامه يقرأ رسالة بصوت مرعب بس في لحظة المقلب قلب بجد والحاجة اللي واقف عليها جويل اتحركت واتشنق فعلا ومكتشفوش جثته إلا تاني يوم الصبح.
- هالوين سنة ١٩٩٢م طالب عنده ١٦ سنة إسمه يوشيهيرو هاتوري
كان رايح يزور واحد صاحبه إسمه "ويب هايماكر" علشان يقضوا الهالوين مع بعض.
لما وصل غلط وخبط على بيت تاني غير بيت صاحبه ولما محدش رد راح علشان يدخل من الباب الخلفي للبيت ودا اللي خلى صاحب البيت يفتكره حرامي وضربه بالرصاص ومات في ساعتها.
- كان فيه واحد إسمه كارل جاكسون عنده ٢١ سنة وكارل ده كان بيخاف جدا يخرج من بيته يوم الهالوين كان عنده يقين إن الشوارع مش أمان أبدا في اليوم ده بس اللي حصل في يوم الهالوين سنة ١٩٩٥م إنه خرج من بيته علشان يجيب ابن صاحبته من حفلة الهالوين اللي هو فيها بس طول الطريق كان المراهقين بيحدفوا عربيته بالبيض احتفالا بالهالوين.
نزل كارل من العربية علشان يتخانق مع اللي بيحدفوه بالبيض بس وهو راجع لعربيته واحد منهم ضربه رصاصة في دماغه ومات في ساعتها.
- سنة ٢٠٠٣م في مريد بأسبانيا كان فيه طالبة راجعة من المدرسة يوم الهالوين بعد إنتهاء اليوم الدراسي لكن قابلها ٣ لابسين ماسك مهرج بابتسامة مرعبة اعترضوا طريقها وخطفوها واغتصبوها وقطعوا جزء من بوقها علشان متقدرش تستغيث ومحدش قدر يعرف مين اللي عمل فيها كدا.
- ٢٠٠٥م الناس لقت جسم نازل من شجرة يوم الهالوين افتكروه لعبة زي الهياكل العظمية اللي بتتعلق وخيال المآتة بس لما قربوا من الجسم ده لقوه جثة حقيقية لواحدة ست مشنوقة ومتعلقه في الشجرة واتأيدت الحادثة انتحار وخلاص.
- سنة ٢٠٠٥م برضو وصل مراهق المستشفى بيعاني من حالة تسمم ولما الدكاترة سألوه كل أو شرب إيه قال إنه كان في حفلة وشرب عصير غريب لونه أخضر ولما عملوله غسيل معدة وحللوا السائل طلع إنه شرب سائل مانع التجمد اللي بيستخدم في محرك السيارات بالغلط والدكاترة ادوله مضاد للتسمم وخف الحمد لله.
- سنة ٢٠١٠م قام راجل وقتل مراته قدام ولاده اللي كانوا طفلين واحد عنده ٨ سنين والتاني ٦ سنين ولما الولاد شافوا الجريمة اترعبوا وهربوا من البيت وراحوا للجيران وحكوا اللي حصل ولما البوليس جه وشاف الجريمة اكتشف إنه مقلب عمله الأب والأم في أولادهم بمناسبة الهالوين.
- سنة ٢٠١٢م واحد في بنسلفانيا أطلق النار على بنت عمه وكانت طفلة صغيرة عندها ٨ سنين وبعد التحقيق عرفوا إن البنت كانت لابسة لبس الهالوين وكان عبارة عن طقية سودة وشراب أبيض وقناع ولما شافها ابن عمها خاف وافتكرها شبح وضربها بالنار رصاصتين اتنين واحدة جت في كتفها والتانية في بطنها واتنقلت البنت للمستشفى ولحقوها الحمد لله.
- سنة ٢٠١٦م دخل السجن مهرج انجليزي إسمه "مايكل مارش" علشان طارد واحدة ست حامل في الشارع وهو ماسك فاس في إيده قال إيه بيهزر معاها بمناسبة الهالوين وده اللي خلى جوزها يتصل بالبوليس اللي جه وقبض على المهرج اللي كان عنده ١٨ سنة واتحكم عليه ب ٦ شهور سجن.
❈-❈-❈
- من ضمن حوادث الهالوين كمان كان فيه بنت شابة والدها بيشتغل حارث مقابر وكانت بتتكسف جدا من شغلة والدها وفي يوم اتحداها زمايلها إنها تعمل اختبار شجاعة وتروح المقبرة بالليل وتردد:
"أنا هنا لتكوين صداقات جديدة"
وقبلت البنت التحدي بالفعل وراحت المقبرة ليلة الهالوين وكانت خايفة جدا لحد ما وقفت قدام قبر معين وقعدت تعيط ولما تمالكت نفسها قررت تخرج من المقبرة بس لما جت تمشي حاجة خفية شدتها من فستانها علشان تمنعها من الخروج من المقبرة.
لما البنت مرجعت بيتها لتاني يوم راح زمايلها يدوروا عليها في المقبرة بس لقوها ميتة جمب القبر اللي كانت واقفة جمبه ولقوا فستانها شابك في مسمار أتاري المسمار هو اللي شبك في فستانها وهي افتكرته شبح وماتت من كتر الخوف.
- من الحوادث المرعبة اللي حصلت كمان لما صحيت بنت يوم الهالوين الصبح على صوت صراخ ولما راحت تشوف في إيه لقت زميلتها في السكن مقتلولة بطريقة بشعة ولما البوليس جه وبالتحريات اكتشفوا آن القاتل خطيب واحدة صاحبة الضحية وقتلها علشان كان بيغير منها على خطيبته بسبب صداقتهم القوية
- طفل صغير حاول يثبت في مناخيره قطعة معدنية باستخدام مغناطيس ونجح بالفعل في تثبيت القطعة في فتحة مناخيره اليمين.
بس لما جه عند الفتحة الشمال وحط فيها المغناطيس من غير ما يعرف إن المغناطيسين هيجذبوا بعض وده اللي حصل بالفعل وحس الولد بألم رهيب واتنقل للمستشفى واضطروا هناك يعملوله عملية علشان يشيلوا المغنطيسين من مناخيره.
- ٣ بنات اتعرضوا للخطف وهما بيلعبوا "Trick or treat" خطفهم واحد تحت تهديد السلاح واعتدى جنسيا على اتنين منهم وقبل ما يغتصب التالتة قدرت تستعمل تليفونها وتتصل بوالدتها وساعتها خاف المجرم وهرب فورا بس متقبضش عليه إلا بعد سنتين من تاريخ حصول الاعتداء.
- في يوم من أيام الهالوين أربع بنات خرجوا من حفلة من الحفلات علشان يروحوا بيوتهم.
وهما في الطريق عدوا من قدام مصنع مهجور معروف عنه إنه مسكون وبيتقال عليه قصص مرعبة كتير جدا زي إنه مليان بالأشباح وبتحصل فيه ظواهر غريبة دا غير الأصوات المرعبة اللي بتخرج منه اللي محدش عارف مصدرها.
بالرغم من كل الحكايات المرعبة دي إلا إن البنات قرروا يدخلوا يستكشفوا المصنع ده بنفسهم علشان يشوفوا إيه حكايته بس اتنين منهم خافوا يدخلوا وقرروا يستنوا برا والاتنين التانيين دخلوا.
بعد نص ساعة من دخولهم بدأت البنتين اللي برا يخافوا ويحسوا إن فيه حاجة غريبة بتحصل جوة وفجأة سمعوا صوت صريخ رهيب جاي من جوة صريخ بيوحي إن البنات اللي جوة حصلتهم حاجة وحشة.
البنات مبقوش عارفين يعملوا إيه وخافوا يدخلوا لزمايلهم وقرروا إنهم يهربوا من المكان ويروحوا يطلبوا مساعدة.
البوليس جه وفتش المصنع حتة حتة بس البنات مكانش ليهم أي أثر ومظهروش تاني لحد دلوقتي ولا حتى ظهرت جثثهم ومن يومها محدش جاتله الجرأة يدخل المصنع ده تاني خصوصا في الهالوين.
- في ليلة من ليالي الهالوين كان سواق أتوبيس ماشي في شارع من الشوارع الضلمة وفجأة شاف بنت واقفة لواحدها في الضلمة صعبت عليه ووقف وركبها معاه.
دخلت البنت وقعدت في آخر الأتوبيس بس كانت طول ماهي قاعدة بتبص للسواق بطريقة غريبة ومرعبة لدرجة إنه خاف منها جدا.
فضلت البنت في الأتوبيس لحد ما وصل لآخر محطة ووقف وبرضو البنت مكانتش بتتحرك من مكانها ومنزلتش.
راحلها السواق علشان يقولها إنها لازم تنزل بس لما وصل عندها لقاها مخبية وشها بإديها.
حاول السواق يتكلم معاها ويخليها تشيل إديها من على وشها بس هي كانت بترفض وفي الآخر قالتله:
- لن تحب ما تراه.
ولما شالت إيدها كانت المفاجأة اللي خرسته وش البنت كان بشع لدرجة مخيفة مشوه كله والجلد واللحم بيقعوا منه والعضم بيبان.
تاني يوم لقوا السواق فاقد الوعي جمب الأتوبيس ونقلوه المستشفى وفضل في غيبوبة لمدة شهر ولما فاق كانت حالته النفسية وحشة جدا واضطروا يدخلوه مصحة نفسية علشان يتعالج وكان علطول بيحكي اللي حصل وهو مرعوب إن الست دي تظهرله تاني.
❈-❈-❈
كدا انا حكيتلكم عن معظم الحوادث اللي حصلت في الهالوين تعالوا بقى احكيلكم عن الأساطير المشهورة اللي بيتقال إنها بتحصل في اليوم ده بالتحديد.
من الأساطير اللي اتقالت عن الموضوع ده:
أسطورة فتاة المنحنى.
الأسطورة دي تعتبر من أشهر قصص الرعب اللي بتتكلم عن الهالوين لأنها غامضة ومنتشرة في أكتر من بلد وكل بلد بتطلق على البنت إسم مختلف عندك مثلا السويد مسميينها فيتا فرون في إيطاليا بقى معروفة بإسم السيدة بيانكا.
الأسطورة بتقول إن في مرة في الهالوين كان فيه واحد ماشي بعربيته وسط الضباب وفي طريق مجهول ومن وسط الضباب ظهرت بنت لابسة فستان أبيض وواقفة على جمب زي ما تكون محتاجة مساعدة أو محتاجة حد يوصلها.
وقف الراجل وعرض على البنت المساعدة وبالفعل وافقت وركبت معاه بس الغريب إنها ركبت على الكرسي اللي ورا ومن غير ما تقول ولا كلمة.
بعد ما مشي السواق شوية بالعربية سمع صوت فجأة بيقول:
"حذار فى المنحنى هناك ماتت"
وفي اللحظة دي بص الراجل ورا مكان ما البنت قاعدة بس الغريب إنه مالقاهاش ولقى نفسه لواحده في العربية.
الأسطورة دي حكاها أكتر من واحد وفي أماكن مختلفة وتقريبا معظمهم بيحكوا نفس التفاصيل مع اختلافات بسيطة واتعمل من القصة دي أفلام رعب كتير جدا وظهرت كمان في حلقة من حلقات مسلسل supernaturals.
- الأسطورة التانية بتتقول إن كان فيه بنت صغيرة قررت تلعب مع أصحابها لعبة مرعبة جديدة.
اللعبة كانت عبارة عن الوقوف قدام مراية الحمام ومعاها الكتاب المقدس وتقول إسم فيرونيكا ٣ مرات ومعاها كمان مقص مفتوح بعد كدا بيقال إن فيرونيكا بتظهر بالفعل فجأة كدا ورا البنت علشان تقتلها.
القصة دي اتقال عنها كلام كتير جدا ومنتشرة في كتير من الدول وفيه اللي بيقول إن عدد مرات ذكر اسم فيرونيكا ٩ مرات مش ٣ وفيه اللي بيقول كمان إن تاريخ الوفاة بيظهر عالمراية وبرضو القصة دي زي اللي قبلها تم استخدامها في كتير من أفلام ومسلسلات الرعب.
بكدا تكون خلصت قصة النهاردة يارب تعجبكم انا جيبت فيها معظم الكلام اللي اتقال عن الهالوين واغرب الحوادث اللي حصلت في اليوم ده.
دمتم بألف خير وإلى لقاء آخر إن شاء الله.
سمر إبراهيم
